Author: literaturia

Olagarro eta albariño

Sailkatu gabea

Literaturiaren irekiera ofiziala gaur izango den arren, aperitif bikaina eskaini ziguten atzo Jon Benitok, Jose Luis Otamendik eta Galiziatik etorritako Isaac Xubinek, olagarro eta albariño artean. Ahazturaren aurka aizkorak zorrozten erakutsi ziguten idazleek.

Gaur Miren Agur Meabek irekiera hitzaldia emango du (“Larruaren kodea”), eta segidan, Anne Sexton-en poemen irakurraldi dramatizatua egingo dute Harkaitz Canok, Ainara Gurrutxagak eta Amorantek (“Ene maite kuttunak”). Zatoz Zarautzera! Zatoz Literaturiara! Larruzabalik hartuko zaitugu!

Literaturia 2016

Literaturia 2016

Literatura plazer-iturri dela frogatzeko hamaika aukera, Literaturian, maiatzaren 19tik 22ra

  • Errezitaldiak, solasaldiak, liburu-aurkezpenak, liburu-azoka eta musika izango dira Zarautzen, larrua ardatz hartuta
  • Miren Agur Meabek egingo du irekiera-hitzaldia, eta Kirmen Uribek, Eider Rodriguezek eta Ruper Ordorikak ere parte hartuko dute jaialdian, besteak beste

Egitarau bete-betea aurkeztu dute Literaturia kultura-elkartearen ordezkariek. Haiekin batera, Oier Guillan idazle eta aktorea, eta Itu Bandako Alazne Arruti ere izan dira aurkezpenean. Hain zuzen ere, haiek dira Literaturian egingo diren bi estreinaldiren partaideak: Mr Señora errezitaldi dramatizatua (Metrokuadroka), eta Isabel Iturberen bizitza eta heriotza ikuskizuna (Itu Banda).

Ez dira horiek lehen aldiz aurkeztuko diren lan bakarrak. Miren Agur Meabek irekiera-hitzaldia eskainiko du; Beñat Axiarik eta Joseba Irazokik hitzak, musika eta inprobisazioa nahastuko dituzte Maitiak galdegin zautan emanaldian; eta larruaz eta literaturaz hitz egingo dute Eider Rodriguezek eta Kirmen Uribek, Goizalde Landabasorekin.

Ruper Ordorikaren bakarkako kontzertu intimoa, Ene maite kuttun guztia errezitaldi musikatu eta antzeztua (Harkaitz Cano, Amorante eta Ainara Gurrutxaga), eta Nork hil du Andoni Egaña? komikian oinarritutako emanaldia (Xabi Paya, Patxi Gallego) ere izango dira ikusgai. Emanaldi horiek guztiak Modelo aretoan izango dira.

Irakurleen eta sortzaileen arteko topagune

Antolatzaileen esanean, Literaturia jaialdi bat baino gehiago da. Liburu-azoka ere bada, eta azken argitalpenen erakusleiho. Baina, batez ere, topagune da: diziplinen arteko topagunea, eta idazleen, editoreen eta irakurleen artekoa. Hain zuzen, liburu-azokak eta liburu argitaratu berrien aurkezpenek aukera ezin hobea eskaintzen die batzuei eta besteei elkartzeko, iritziak trukatzeko eta harremanak egiteko. Azoka Musika Plazan izango da, eta aurkezpenak, berriz, Garoa liburu-dendan. Horrenbestez, herri gunean bilduko dira Literaturiaren ekitaldi guztiak.

Aipatutakoez gain, beste ekitaldi batzuk ere izango dira: poesia-bideoak euskaratu eta azpititulatzeko tailerra, kontzertuak, poesia-errezitaldiak… Denak, gai baten inguruan, larrua, eta lelo baten pean: plazer hutsa. Gozatzeko aukerak, behintzat, izango dira.

Jarraian, prentsaurrekoko hainbat argazki eta aurtengo kartela.

literaturia16-KARTELAA4-(1)

 

 

 

Plazer hutsa

Literaturia 2016

Larrua izango da Literaturia jaialdiaren aurtengo gaia

  • Zarautzen ospatuko da, maiatzaren 19tik 22ra
  • Emanaldiak, liburu-azoka eta liburu-aurkezpenak izango dira

Ekitaldiz bete-betea dator aurten ere maiatzaren 20ko asteburuan ospatuko den euskal letren azoka, Literaturia. “Larrua” gaitzat harturik hainbat idazlek eta musikarik hartuko dute parte, “Plazer hutsa” lelopean.

Besteak beste, Miren Agur Meabek egingo du irekiera hitzaldia eta Eider Rodriguez eta Kirmen Uribe parez pare izango dira euren jardunari buruzko solasean, Goizalde Landabasok gidatuta. Harkaitz Canok Anne Sexton-en poematan oinarrituriko “Ene maite kuttunak” ekitaldia aurkeztuko du, Iban Urizar (Amorante) musikaria eta Ainara Gurrutxaga aktorearekin batera; Itu Bandakoak ere Zarauzko plaza honetan izango dira, eta Ruper Ordorikak kontzertu berezi eta intimoa eskainiko du. Xabier Paya “Nork hil du Andoni Egaña?” liburuan oinarrituriko ikuskizunaren estreinaldiarekin etorriko da, eta Zarauzko Modelo aretoan izango dira, era berean, Axiari eta Irazoki, Oier Guillan eta Metrokoadroka. Poesia-bideoak azpititulatzeko tailerrak segida izango du aurten ere.

Iazko arrakastari eustea da Literaturia osatzen duen lan-talde sendotuaren asmorik garrantzitsuena, eta Zarautz udaberriko euskarazko liburuen erakusleku bihurtzea. Hala, ekitaldi hauez gain, udaberrian argitaratzekoak diren liburuen aurkezpenak egingo dira Garoa liburu-dendan, eta liburu-azoka izango da Musika plazan.

Bestalde, bidean da dagoeneko Literaturia 2016 sustatzeko bideoa. Apirilaren 20an aurkeztuko dugu, egitarau osoarekin batera, Donostiako Garoa liburu-dendan egingo dugun prentsaurrekoan.

Ahaleginak merezi izan du

Albisteak 2015, Literaturia 2015

DSC_0141

Aurreikuspen guztiak gainditu ditu Literaturia-Euskal Letren Plazak, eta Literaturia Kultur Elkarteko ok oso gustura gaude jaialdiak iraun duen hiru egunetan, eta aurretiko ekitaldietan, izan duen erantzunarekin. Zarauzko lantaldeak iaz hartu genuen Larrabetzukoen lekukoa, eta estreinako aldi hura trantsiziokoa izan zen; nolabait esateko, elkarlanean antolatu zen. Aurten, aldiz, gure gain hartu dugu ardura hasiera-hasieratik, eta ilusio handiz aritu gara prestatzen ia bederatzi hilabetez. Asteburuan ikusi ahal izan dugu emaitza, eta emaitza izan da merezi izan duela ahaleginak.

Jende asko gerturatu da antolatutako ekitaldietara eta liburu-aurkezpenetara, eta azokan ere uneoro izan dira literaturzaleak. Modelo aretoa bitan bete genuen: bata, ostiralean, Anjel Lertxurdiren irekiera eta Harkaitz Cano-Mursegoren Porto ikuskizunarekin, eta bigarrena, igande goizean, Dejabu Panpin Laborategiaren haur-antzerkiarekin. Gainerako emanaldietako bataz besteko ehun ikuslerena izan da; kontuan izan, egin zuen eguraldia izanda eta ordutegia askok nahiago izan zutela Literaturia hondartza baino. Garrantzitsua iruditzen zaigu, gainera, publikoa denetarikoa izan zela nabarmentzea, eta ekitaldiaren arabera publiko-mota bat edo beste hurbildu zela, herrikoak zein kanpokoak izan; esaterako, Erractus-ek publiko gazteagoa izan zuen, solasaldiak helduagoa eta Ardoa eta odola-k musikazaleagoa edo zinemazaleagoa.

Oihartzun zabala izan dugu komunikabideetan, eta zeresanik ez sare-sozialetan. Umap Euskaraz plataformaren arabera, igandeko iluntzeko 21:00etan Literaturia gairik aipatuena izan zen twitter-en (12 orduz), #OdoleanDaramagu traolarekin. Horrek esan nahi du asteburuko beste bi jaialdi handiagoek –Ibilaldia eta Olatu Talka– baino jarraipen handiagoa izan zuela sarean.

Azkenik, biziki eskertu nahi ditugu aurtengo Literaturia behar bezala ateratzeko eduki dugun laguntza eta babes guztia, bai laguntzaileen aldetik bai argitaletxeen aldetik, eta, nola ez, Zarauzko Udalaren aldetik ere. Bestalde, ikuslearen babesa ikaragarria izan da, haiek gabe ezingo genuke jaialdia altxa. Zorion mezuak izan ditugu eta eskertuta gaude guztiz. Hala ere, kritikak eta iradokizunak ere eskertzen ditugu, gure asmoa Euskal Letren Plaza hobetzen jarraitzea da. Gurekin harremanetan jarri nahi dutenek: literaturia2015@gmail.com

Literaturiak eman duena helbide hauetan topatu dezakezue:

http://literaturia.eus/ eta https://www.flickr.com/photos/literaturia

Odolean… bertsotan bukatu arte!

Albisteak 2015

DSC_0020

Celosamente Gordeak, Napoka Iria eta Joseba B. Lenoir lagun, hildako gizona oso bizirik dagoela ziurtatu zigu. Edorta Jimenezek, berriz, James Joyce eta Nora Barnacle izan dituen aztergai, mormoien liburuaren arrastoan. Txakolin nafarraren identitate galduaren bila aritu ginen Zarauzko kaleetan zehar, eta batzuk Athleticeko elastikoa soineratu bazuten ere, kata bereziz busti ginen putzuzulotan, bertsorik bertso, Onintza Enbeita, Mantxi, Unai Iturriaga eta Uxue Alberdirekin.

Gaur irria alderik alde dugula esnatu gara, literatura eta ardoa oraindik zainetatik barreiatzen zaigun seinale.

Lagunok, edatera

Albisteak 2015, Sailkatu gabea

IMG_7110

Anjel Lertxundik ozen esan zuen atzo, Literaturia 2015eko irekiera ekitaldian: “Lagunok, edatera”. Eta zintzurra bustitzen hasteko, portoa ahoratu genuen Mursego eta Harkaitz Canoren eskutik. Portoa bakarrik ez, baita ginebra eta vodka hip-hopero bat, ‘vaya!’.

Gaurko goiz-eguerdia ere ederra izan dugu, eguzkia eta literaturzaleen giro ona lagun. Liburu azoka, uzta berriko liburuen aurkezpenak Garoan, Erractus hirukotearen aldarria eta azpititulatutako poesiaren emaitzak.

Literaturiaren lehen egun erdia bide onetik doa. Beraz, lagunok… edatera.

Orain artekoa argazkitan ikusteko klikatu gainean.

Irekiera ofiziala portoarekin

Albisteak 2015

cano-mursego

Atzo txakolinarekin abiarazi genuen Literaturia 2015, eta gaur portoarekin jarraituko dugu. Kasu honetan, Harkaitz Cano idazlearen eta Mursego musikariaren arteko uztarketak asetuko digu gogoa; Modelo aretoko oholtza gainean izango ditugu, 20:00etan. Aurretik, ordu erdi lehenago, Euskal Letren Plazari behar bezalako irekiera emango dio Anjel Lertxundi idazle-adiskideak Modelon bertan.

Mormoiak bisitan datozkigu

Albisteak 2015

MI-jamesnora

Edorta Jimenezek Mormoien bisita (Nora Barnacleren omenez) ikuskizuna eskainiko du, AurresQ taldea bidelagun. Emanaldia larunbatean izango da, 19:00etan, Modelo aretoan. Apertibo gisa, Charles Baudeleire poetaren olerki bat euskaratuta bidali digu Jimenezek:

 

Le vin des amants

Aujourd’hui l’espace est splendide!

Sans mors, sans éperons, sans bride,

Partons à cheval sur le vin

Pour un ciel féerique et divin!

 
Comme deux anges que torture

Une implacable calenture,

Dans le bleu cristal du matin

Suivons le mirage lointain!

 
Mollement balancés sur l’aile

Du tourbillon intelligent,

Dans un délire parallèle,

 
Ma soeur, côte à côte nageant,

Nous fuirons sans repos ni trêves

Vers le paradis de mes rêves!

 

Maitaleen ardoa

Noiz gaurkoa legezko aro bikainik!

Ez galgarik, ez uhalik, ez ezproirik,

goazen ardoaren bila, zaldiz, arin,

Ortzian barna maitale, azti eta sorgin.

 
Sukar menderakaitzak torturatu

aingeru biren moduan, aizu,

bila dezagun hango irudi urrunean

goizeko ispiluak dituen isla azuletan!

 
Zirimola inteligente honetan

-honelako eldarniorik noiz?-

Aire-uhin leunetan goaz hegan.

 
Arreba, igerian biok batera airos,

Ez eten (e)ta ez atseden, ardotara!

Nire ametsetakoa den paradisura.

Zentzumenak suspertu zaizkigu

Albisteak 2015

IMG_7009

Arratsalde zoragarria pasatu genuen atzo Talai-Berri txakolindegian, Literaturia 2015eko lehen hitzorduan, ‘Zentzumenen zoramena‘ ekitaldian. Tere Irastorza, Oier Santos, Gaizka Zabarte eta Katixa Agirre idazleek euren azken laneko pasarteak irakurri zituzten, eta Maddalen Marzol lurringileak usaina jarrai zien pasarteoi eta Itziar Eizagirre enologoak zaporea. Gozatu ederra hartu genuen bertaratu ginen guztiok. Mila esker!